في عيد ميلاد بيومي فؤاد.. موقفه من كلمة النحيت وشهرته المتأخ
02:28 م
الجمعة 16 يونيو 2023
يحتفل اليوم الجمعة، الفنان بيومي فؤاد بعيد ميلاده الـ 58 الذي يوافق يوم 16 يونيو اذ أنه من مواليد 1965، وبهذه المناسبة نستعرض لكم موقفه من كلمة النحيت وشهرته المتأخرة وأول أجر تقاضاه.
وقال بيومي فؤاد، في لقاء تليفزيوني سابق ببرنامج “التاسعة”: “النحيت كلمة المفروض أنها تزعل لأن النحيت المعنى الحقيقي ليها هو الشخص اللي بيشتغل كتير دون الرجوع للجودة ، مبيهموش أنه يقدم مضموناً جيدًا فالمفروض أنها تزعل لكن احنا بنقولها مع بعض بنقعد نقولها مبنزعلش من منطلق الهزار.. في مرة إياد نصار عملي أغنية على النحيت وقعدنا نضحك على المسألة دي ومرة الفنان محمد رمضان كان زعلان مني في حاجة فكتبهالي على السوشيال ميديا”.
وعن بداية شهرته، فأوضح: “أنا بمثل من قبل 2013 ومن زمان على مستوى الهواة، لكن البداية الحقيقية كانت في 2013 أنا من ساعة تخرجي وأنا بمثل مسرح هواة ودخلت من 2003 إلى 2006 مركز الإبداع الفني عند أستاذ خالد جلال وقبله بشوية كنت بعمل مسرح دولة ولأن أستاذ خالد جلال كان في وقت من الأوقات مدير مسرح الشباب فشافني فطلب مني أقدم في الدفعة الأولى بعدما تخرجت واشتغلت مسرح كتير، مسرح دولة، ومسرح هواة، لكن 2013 هى البداية الحقيقية لي”.
وتابع حديثه عن شهرته المتأخرة بعد سن الخمسين، قائلا: “أنا عمري ما اضايقت من الموضوع ده لأن عمري ما حسيت اني متأخر عن حاجة.. أنا كنت بعمل اللي يبسطني وأنا طول عمري كنت بحلم وأنا عيل صغير يا إما أبقى لعيب كورة يا إما ممثل من منطلق أن الناس دي بتعمل اللي بيحبوه وفي نفس الوقت يتقاضوا عنه أجرا” .
وعن أول أجر تقاضاه في بداية مشواره الفني، فأضاف: “أنا سبع سنين مثلت بدون أجر أول أجر تقاضيته كان سنة 1997 وعملت مسرحية في مركز الهناجر للفنون بدار الأوبرا وقعدنا سنتين نعمل بروفات وعرضت 15 ليلة وخدت 750 جنيه وده مبلغ بالنسبالي رهيب، وفي سنة 98 بدأت أشتغل مسرح دولة فكنا بناخد على 30 ليلة عرض 2000 جنيه ده ليالي العرض فقط لأنك مش موظف مش هتاخد على البروفات تاخد على العرض فقط والمسرح مش شغال الـ 30 ليلة ورا بعض لكن أنا مرضي الحمد لله وزي الفل”.
